Në kuadër të Tetorit të Librit dhe Tetorit Rozë, Shoqata “ALBACCESS OPEN”, në bashkëpunim me Bibliotekën Kombëtare të Shqipërisë dhe IEVP Pojskë, organizoi një aktivitet kulturor dhe edukativ, me fokus te promovimi i librit, nxitja e leximit, fuqizimi përmes kulturës dhe mbështetja e grave të privuara nga liria.

Aktiviteti, i organizuar me nismën e znj. Enkeleida Fezjo, përfaqësuese e Shoqatës “ALBACCESS OPEN”, bëri bashkë përfaqësues të institucioneve, autore dhe gra të privuara nga liria, në një hapësirë të përbashkët dialogu, leximi dhe reflektimi.

Të pranishme në këtë veprimtari ishin drejtoresha e Bibliotekës Kombëtare të Shqipërisë, znj. Majlinda Toçi, si dhe shkrimtarja dhe poetja Meri Mezini, aktiviste në çështje të ndryshme sociale.

“Biblioteka për Bibliotekat”, një nismë për më shumë dije dhe mundësi

Një nga momentet më të rëndësishme të aktivitetit ishte nisja zyrtare e fushatës “Biblioteka për Bibliotekat” nga Biblioteka Kombëtare e Shqipërisë.

Në kuadër të kësaj nisme, për herë të parë, Biblioteka Kombëtare realizoi një donacion librash për bibliotekën e një institucioni të kësaj tipologjie, duke dhuruar rreth 100 libra dhe romane për bibliotekën e IEVP Pojskë.

Ky donacion përbën një kontribut të rëndësishëm në pasurimin e fondit të bibliotekës dhe në krijimin e mundësive të reja për lexim, edukim dhe zhvillim kulturor.

Përmes librit, gratë e privuara nga liria mund të kenë akses në dije, informacion, imagjinatë dhe reflektim, duke e shndërruar bibliotekën në një hapësirë të rëndësishme komunikimi, edukimi dhe rehabilitimi.

Fushata “Biblioteka për Bibliotekat” synon të mbështesë bibliotekat dhe të nxisë qarkullimin e librit te lexues të ndryshëm dhe në mjedise të ndryshme, duke sjellë kulturën dhe dijen më pranë çdo komuniteti.

Libri si pjesë e procesit të rehabilitimit

Në vijim të aktivitetit, u zhvillua edhe takimi i radhës i Klubit të Librit, një hapësirë e krijuar për të nxitur leximin, bashkëbisedimin, kulturën dhe zhvillimin personal.

Në qendër të takimit ishte libri “Lotët dhe Dashuria në sportelet e Burgut”, me autore Meri Mezinin. Përmes librit dhe bashkëbisedimit me pjesëmarrëset, aktiviteti u kthye në një mundësi për të ndarë mendime, për të reflektuar mbi jetën dhe për të diskutuar mbi fuqinë që ka fjala e shkruar në jetën e individit.

Leximi nuk është vetëm një mënyrë për të kaluar kohën. Ai është një mjet për të mësuar, për të reflektuar, për të kuptuar veten dhe të tjerët, si dhe për të krijuar perspektiva të reja. Pikërisht për këtë arsye, nisma të tilla marrin një rëndësi të veçantë në procesin e rehabilitimit dhe të riintegrimit social.

Një hap drejt një kulture më gjithëpërfshirëse

Shoqata “ALBACCESS OPEN” vlerëson se aksesi në kulturë, dije dhe edukim duhet të jetë i mundur për të gjithë, pavarësisht rrethanave të tyre.

Aktivitete të tilla synojnë të krijojnë ura bashkëpunimi ndërmjet institucioneve dhe shoqërisë civile, duke u ofruar grave të privuara nga liria mundësi për të lexuar, për të mësuar, për t’u shprehur dhe për të marrë pjesë në jetën kulturore.

Shoqata “ALBACCESS OPEN” shpreh mirënjohjen për znj. Fatbardha Hoxhalli, drejtoreshë e IEVP Pojskë, si dhe për të gjithë stafin e institucionit, për bashkëpunimin, mbështetjen dhe mikpritjen gjatë realizimit të këtij aktiviteti.

Një mirënjohje e veçantë i shkon Bibliotekës Kombëtare të Shqipërisë për kontributin dhe mbështetjen përmes donacionit të librave, si dhe të gjitha pjesëmarrëseve që e kthyen këtë takim në një moment të rëndësishëm dialogu dhe reflektimi.

Sepse një libër mund të hapë një dritare të re. Dhe çdo dritare drejt dijes është një hap drejt shpresës, zhvillimit dhe riintegrimit.