Projekti kulturo-artistik “Frymëzim mbi Dallgë” u realizua në qytetin e Vlorës me mbështetjen e Bashkisë Vlorë, si një iniciativë që synon të promovojë krijimtarinë letrare dhe të forcojë lidhjen shpirtërore me qytetin dhe detin.

Në kuadër të këtij aktiviteti u realizua një përmbledhje poetike unike, ku morën pjesë autorë vlonjatë nga tre breza të ndryshëm, duke sjellë një ndërthurje të përvojës, ndjeshmërisë dhe këndvështrimeve bashkëkohore mbi jetën, historinë dhe identitetin e Vlorës. Poezitë e përfshira në këtë botim trajtojnë motive të ndryshme si atdhetaria, lirika personale, dashuria për vendlindjen, si dhe reflektime mbi detin, kujtesën dhe transformimet e qytetit ndër vite.

Nën drejtimin artistik të Znj. Enrieta Sina, projekti arriti të finalizojë dhe botojë më shumë se 80 poezi kushtuar Vlorës, duke krijuar një antologji të pasur dhe të larmishme poetike. Kjo përmbledhje përfaqëson jo vetëm një vlerë artistike, por edhe një dokument kulturor që ruan dhe promovon identitetin e qytetit përmes zërit të poetëve të tij.