Përgjatë dy netëve artistike, publiku do të ketë mundësinë të përjetojë interpretime të veçanta të këngës polifonike, valleve tradicionale, muzikës folklorike dhe krijimeve artistike që pasqyrojnë identitetin kulturor shqiptar. Festivali synon jo vetëm ruajtjen dhe promovimin e vlerave burimore të folklorit, por edhe përcjelljen e tyre te brezat e rinj.

Programi nis më 26 Qershor me ceremoninë e hapjes dhe koktejin e mirëseardhjes në Sheshin “Minatori”, të ndjekur nga parada e grupeve pjesëmarrëse dhe ceremonia zyrtare e hapjes së festivalit. Gjatë dy mbrëmjeve do të ngjiten në skenë ansamble dhe grupe folklorike nga Shqipëria, Kosova, Mali i Zi, diaspora shqiptare në Greqi dhe shumë artistë të njohur të traditës shqiptare.

“Jehona e Vjosës” është tashmë një traditë e rëndësishme për qytetin e Memaliajt dhe më gjerë, duke e kthyer qytetin në një qendër të promovimit të kulturës, folklorit dhe turizmit shqiptar. Edicioni i tretë premton dy netë të mbushura me emocione, traditë dhe art në zemër të Luginës së Vjosës.